වංචනික බැංකු ව්‍යාපාර පිළිබඳ අවධානයෙන

– බස්නාහිර පළාත – දිලංගා ගෝමස් –

සණස සමිතිය යන නාමයට මුවා වෙමින් නීතිවිරෝධි ලෙස මුදල් එකතු කර වංචනිකව බැංකු ව්‍යාපාරයක් පවත්වාගෙන යමින් රුපියල් විසිහය ලක්ෂ පනස් දහසක (2650000/-) ක ස්ථාවර තැන්පතු මුදලක් වංචා කරන ලද මූල්‍ය ආයතනයක් පිළිබඳ පසුගියදා අනාවරණය විය.

රත්මලාන පිරිවෙන පාරේ පිහිටි සණස සමිති ශාඛාවේ බැංකුවක් ලෙස ට පවත්වාගෙන ගොස් ඇති එකී බැංකුව ශ්‍රී ලංකා කළමණාකාර නිලධාරීන්ගේ සහ සංවර්ධන සමූපකාර බැංකුව (SRI LANKA STATE MANAGEMENT OFFICES SAVINGS AND DEVELOPMENT COOPERATIVE BANK) යන
නාමයෙන් හඳුන්වයි.

2015 වර්ෂයේ අප්‍රේල් මස 5 වන දින රුපියල් විසිහය ලක්ෂ පනස් දහසක මුදලක් කාන්තාවක විසින් ස්ථිර තැන්පතුවක් ලෙස ඉහත නමින් පවත්වාගෙන යනු ලබන මූල්‍ය ආයතනයේ තැන්පත් කර ඇත.

තැන්පත් කරන ලද මෙම මුදල් වසර දෙකක කල් පිරීමෙන් අනතුරුව මුදල් ආපසු ගත හැකි වන්නේ වර්ෂ 2017 අප්‍රේල් මස 16 වන දින බවට සඳහන් කරන ලද එම ආයතනයේ බලයලත නිලධාරීන් දෙදෙනකු විසින් අත්සන් කළ ස්ථාවර තැන්පතු සහතිකයක් තැන්පත්කාරිය වෙත නිකුත් කර ඇත.

අදාල ස්ථාවර තැන්පත් සහතිකයේ ලියාපදිංචි අංකය යනුවෙන් කෝපරේට් ඇන්ටි අංක පහ ඔෆ් 1972 කියා මුද්‍රා කරන ලද අංක (6 5 5 5 8 0 ) යනුවෙන් සහ ස්ථාවර තැන්පතු ගිණුම් අංකය ද සඳහන් කර තැන්පත්කාරිනිය වෙත ස්ථාවර තැන්පතුවක් ලබා දී ඇත.

තැන්පත් කරන ලද රුපියල් විසිහය ලක්ෂ පනස් දහසක මුදල වෙනුවෙන් මාස 24 ක කාලයක් සඳහා 13% ක පොලී අනුපාතයක් ලබාදෙන බව පවසා තැන්පත්කාරිනිය වෙත මෙම සහතිකය කළමනාකාරිණිය විසින් ලබා දී ඇත.

ස්ථාවර තැන්පතුව කල් පිරීමෙන් අනතුරුව තැන්පත්කාරිනිය විසින් අදාල මූල්‍ය ආයතනය වෙත ගොස් මුදල් ආපසු ලබාදෙන ලෙස ඉල්ලා ඇත. එම අවස්ථාවේදී එහි සිටි නිලධාරියෙකු විසින් මුදල් ලබාදීම ප්‍රතික්ෂේප කිරීමත් සමග තැන්පත්කාරිනිය විසින් බස්නාහිර පළාතේ මධ්‍යම පළාත් ආයතනයෙන් මෙකී මූල්‍ය ආයතනය කුමක්ද යන්න පිළිබඳ සොයා බැලීමක් කර ඇත. එහිදී තැන්පත්කාරිය සමුපකාර දෙපාර්තමේන්තුව වෙත යොමු කර ඇත. ඒ අනුව සමුපකාර සංවර්ධන දෙපාර්තමේන්තුවේ සමුපකාර සමිතියක් ලෙසට අදාළ කුවිතාන්සියේ සදහන් කර ඇති නාමය වන ශ්‍රී ලංකා රාජ්‍ය කළමනාකරණ නිලධාරීන්ගේ ඉතිරි කිරීමේ සහ සංවර්ධන සමුපකාර බැංකුව යන ආයතනය තම දෙපාර්තමේන්තුවේ ලියාපදිංචි කළ සමුපකාර සමිතියක් හෝසංගමයක් නොවන බවට සඳහන් කරමින් සමුපකාර සංවර්ධන දෙපාර්තමේන්තුවේ නියෝජ්‍ය කොමසාරිස් වරයා ලිපියකින් දන්වා ඇත.

තවද පසුගිය ඔක්තෝම්බර් මසදී තැන්පත්කාරිය විසින් අදාළ මූල්‍ය ආයතනය ශ්‍රී ලංකා මහ බැංකුවේ බලපත්‍ර හිමි මූල්‍ය ආයතනයක් ද යන්න විමසා යොමු කරන ලද ලිපියට පිළිතුරු වශයෙන් ශ්‍රී ලංකා මහ බැංකුවේ බැංකු නොවන මූල්‍ය ආයතන අධීක්ෂණ දෙපාර්තමේන්තුවේ අධීක්ෂකවරයා විසින් දන්වා ඇත්තේ මෙකී මූල්‍ය ආයතනය ශ්‍රී ලංකා මහ බැංකුවේ බලපත්‍ර සහිත බලයලත් මූල්‍ය ආයතනයක් නොවන බවත් මහජනතාවගෙන් තැන්පතු භාර ගැනීමට මෙම මූල්‍ය ආයතනයට කිසිදු අවසරයක් නොමැති බවත්ය.

එසේ වුවද තැන්පත්කාරිය වසර 10 ක කාලයක සිට අදාළ මූල්‍ය ආයතනයේ ගිණුම් දෙකක් පවත්වාගෙන ගොස් ඇති අතර එම විශ්වාසය මත මෙහි මුදල් තැන්පත් කර ඇත.

මුදල් තැන්පත් කරන අවස්ථාවේ දී එම මූල්‍ය ආයතනයේ කළමනාකාරිනිය ව සිටි තැනැත්තිය මේ වන විටත් එහි කළමනාකාරිනිය වශයෙන් සේවය කරනු ලබන බවත් අදාළ මූල්‍ය වංචා පිළිබඳ මුදල් තැන්පත්කාරිය විසින් 2021 වර්ෂයේ පෙබරවාරි මස ගල්කිස්ස පොලිසිය වෙත පැමිණිල්ලක් ඉදිරිපත් කර ඇත.

නමුදු මේ වන තෙක් අදාළ මූල්‍ය ආයතනය සම්බන්ධයෙන් හෝඑහි කළමනාකාරිනිය ඇතුළු සේවකයින් සම්බන්ධයෙන් කිසිදු පියවරක් පොලිසිය විසින් ගෙන නොමැත.

මෙලෙස බලපත්‍ර නොමැතිව පවත්වාගෙන යනු ලබන මූල්‍ය ආයතන සම්බන්ධයෙන් ශ්‍රී ලංකා මහ බැංකුව හෝබැංකු නොවන මූල්‍ය ආයතන අධීක්ෂණ දෙපාර්තමේන්තුව විසින් සොයා බැලීමක් සිදු කළ යුතුය.

මෙවැනි ව්‍යාජ මුල්‍ය ආයතන පිළිබඳ විමර්ශන සිදු නොකිරීමත්, මෙවැනි ආයතන සම්බන්ධයෙන් දැඩි නීතිමය පියවර නොගැනීමත් හේතුවෙන් ජනතාව වංචාවට ලක්වීම වැළැක්විය නොහැකිය.